Ek het onlags by ‘n webgroep (woordpaljas) aangesluit waar ek meer blootstelling kan kry in die kuns van dig. My vorige poging van Potensiaal het positiewe kommentaar gelok, maar ek is aangemoedig om meer visueel te skryf en minder vertellend. Hier is dus weergawe twee. Gaan vergelyk dit gerus met weergawe een. Julle kommentaar sal hoog op prys gestel word!
Gevangene
agter tralies van verwyte.
Geboei deur my onvermoë
om die vryvlug van potensiaal
te geniet, te verken.
Alles aan my toevertrou
het agter gebly.
‘n Handvol sente, in ‘n verlore beursie.
Klankloos roep ek
sal my noodkreet tog nie
die tralies en boeie deurdring,
die spoor van noodlot swaai
en my bevry nie?
Maar klipore het harde harte
en potensiaal dien sy eie meester.
Buig oop jou tralies
en breek jou boeie
Smalend staar ek die handvol sente
in my beursie aan
die koggelkreet van die sente
vervang met die soet oorwinning
van vry wees
